حط بتاع الجوافة
علمك وسط الجوافة
شوفته وسألت نفسي
هو بتاع الجوافة
بيحب مصر ليه؟؟؟؟
طب ليه كان دمه فاير
علشان ماتش الجزاير
مع إنه بيبقى ماشي
و مافيش في الجيب جنيه
عم بتاع الجوافة
متضايق النهاردة
أصله ماباعشي النهاردة
بس الماتش النهاردة
يبقى هيستني ليه
عم بتاع الجوافة
هيشوف الماتش فين؟؟
أصله ماعندوش ريسيفر
هيجيب إزاي ريسيفر
والتليفزيون ماجاش
ممكن على قهوة يقعد
بس القعدة بفلوس
ومافيش قهوة ببلاش
عم بتاع الجوافة
وياه اتنين جنيه
و استلف اتنين جنيه
راح في القهوة ودفعهم
وقعد على نص كرسي
و قال بـ عِلْو صوته
ان شاء الله هنوصل
أملنا ما انتهاش
عم بتاع الجوافة
ماسكتشي لحظة واحدة
وفضل من قلبه يُصــْرُخ
وينادي مصر مصر
عاش منتخبنا عاااااااااش
واتحمس لما شافنا
كل الجماهير علينا
وبنلعب تحت ضغط
ونسيت أقوللكم
عم بتاع الجوافة
كان أصلا عنده ضغط
عم بتاع الجوافة
عديت تاني يوم عليه
في مكانه مالاقيتوش
قلـقـتني أوي الحكاية
وسألت عليه قالولي
محجوز جوة العناية
حودت عليه وشوفته
كان راقد في السرير
و معاه قفص جوافته
ولاقيت قفص الجوافة
لسة العلم عليه
ماسألتش عامل ايه
أو حتى جراله ايه
كان عندي سؤال كبير
محتاج جواب عليه
لما انت بتاع جوافة
ومادام مش لاقي تاكل
بتحب مصر ليه؟؟
بتحب مصر ليييييييييييييييييييه؟؟؟
طلـّع قفص الجوافة
إدّاني جوافة منهم
قاللي اسأل الجوافة
هوّ انتي يا جوافة
جواكي بذر ليه؟؟
لو عايز يا ابني تعرف
بنحب مصر ليه
روح إسال القمر
بينور ليلنا ليه
إسال شمس الصباح
بِتجيلنا الصبح ليه
روح إسأل الزهور
جواها عطر ليه
روح إسأل كل أم
بتحب وليدها ليه
حب البلد دي يا ابني
شئ مفطورين عليه
احنا بنعشقها عشق
ومادام القلب يعشق
يبقى ما تسألشي ليه
عم بتاع الجوافة
علمني حاجات كتير
علمني يا مصر انك
مش نيل و هرم و سد
علمني يا مصر إنك
ناس بتحبك بجد
علمني …إن علَمك
هيعيش يامصر عالي
غصبا ْعن أي حد
مصر قلوب بالمحبة
زرعت في الأرض حبّة
طرحت روحنا اللي حابة
حتى الحزن اللي فيها
مصر في ضلمتنا شمعة
واحنا في ضلمتها شمعة
وبترسم فوق خدودنا
في كل لحظة دمعة
لكن علشان خاطرها
دمعتنا بنداريها
هيعيش يا مصر علمك
هيعيش برغم ألمك
رغم عذابنا وعذابك
هيعيش دايما مرفرف
علشان الدنيا تعرف
اننا عاشقين ترابك
حبك مش ماتش كورة
حبك جوانا صورة
مرسومة بلون دمانا
لو يوم هيحبسوكي
لو في القفص سابوكي
هترفرفي في سمانا
ارفعي راسك لفوووووق
ارفعي راسك لفوووووق
أرواحنا بتـنـتميلك
دمّها دايب في نيلك
ولا شئ في الدنيا ممكن
يغير انتمائنا
وقت الجوع بـيكي نشبع
وقت العطش انتي مائنا
احنا ببساطة انتي
وانتي ببساطة احنا
وسواء عايشبن في عشة
أو عايشين جوة قصر
برضو هتفضل قلوبنا
دايما تحب مصر
ارفعي راسك لفوق
حتى في زمن الدموع
حتى في زمن السخافة
ارفع راسي لفوق
وكفاية إن فيكي
انسان بيموت عشانك
انسان عاشق كيانك
زي بتاع الجوافة
#عم_بتاع_الجوافة
#محمود_أبو_العزم